Баршаға сәлем, қымбатты оқырман!
Назарларыңызға бүгінгі күннің ең маңызды жаңалықтарын ұсынамыз📍
Биыл қаңтар айында желтоқсанмен салыстырғанда жеке тұлғаларға берілетін кредиттердің көлемі 15,8%-ға төмендеген
Бірінші кредиттік бюро мәліметі бойынша ипотека бойынша айтарлықтай төмендеу байқалды – желтоқсанның жоғары көрсеткішіне қарағанда 44%-ға азайып, қаңтарда 153,1 млрд теңгені құрады.
Бірақ жылдық салыстыруда бұл көрсеткіш өсті, және қазір 2024 жылдың екінші жартысындағы жоғары көрсеткіштерге дейінгі деңгейде. Жалпы ипотекалық портфель 1 ақпанда 6,7 трлн теңгеге жуықтап, 631 мың келісімшарт пен 603 мың қарыз алушыны қамтыды.
Автокредиттер де төмендеді, айлық көрсеткіш 46%-ға азайып, 125,9 млрд теңге болды. Жылдық салыстыруда да 4%-ға төмендеген.
Мәссаған😶
Енді Қазақстанда несие алуға қоңырау арқылы тыйым салуға болады
Қазақстандықтар енді 1414 нөміріне қоңырау шалып, несие рәсімдеуге шектеу қоя алады
Елімізде азаматтардың рұқсатынсыз несие рәсімдеу фактілерінің алдын алу мақсатында жаңа қызмет іске қосылды. Енді қазақстандықтар 1414 нөміріне қоңырау шалып, дауыс ботының көмегімен өз атына несие алуға тыйым сала алады.
Қызметті қалай пайдалануға болады?
1️⃣ 1414 нөміріне тегін қоңырау шалыңыз;
2️⃣ Қажетті тілді таңдаңыз (қазақша/орысша);
3️⃣ “Несиеге тыйым салу” деп айтыңыз;
4️⃣ Дыбыстық белгі естілген соң ЖСН енгізіңіз;
5️⃣ SMS-код арқылы әрекетті растаңыз.
Осыдан кейін сіз:
✔️ Несие алуға тыйым қоя аласыз;
✔️ Қажет болған жағдайда бұл шектеуді алып тастай аласыз;
✔️ Қызметтің мәртебесін тексере аласыз.
Аталған қызметті Бірінші несие бюросы мен “Азаматтарға арналған үкімет” мемлекеттік корпорациясы бірлесіп іске қосты. Бұл әсіресе смартфон қолданбайтын немесе интернетке қолжетімділігі шектеулі азаматтар үшін пайдалы болмақ.
Тыйым салу тәртібі жеңілдей түсіпті👍
Еліміз Еуропалық Одаққа бал экспорттайтын болды
Қазақстан Республикасы ресми түрде Еуропалық Одақ елдеріне бал экспорттауға рұқсат алды. Тиісті қаулы 2025 жылдың 21 ақпанында Еуропалық комиссия тарапынан жарияланды
Бұл жетістік Қазақстан Республикасы Ауыл шаруашылығы министрлігінің көпжылдық еңбегінің нәтижесі.
Министрлік балдағы қалдық заттарды бақылаудың Ұлттық жоспарын әзірлеп, енгізу бойынша ауқымды жұмыс жүргізді, бұл Қазақстанды ЕО-ға осы өнімді экспорттауға құқығы бар елдер тізіміне қосу үшін маңызды қадам болды. Дайындық аясында Еуроодақ талаптарына сәйкестікті қамтамасыз ету мақсатында көптеген семинарлар, кеңестер мен тексерулер өткізілді.
Еуропалық Комиссия қаулысының 2-бабына сәйкес, бұл шешім Еуропалық Одақтың Ресми журналында жарияланған күннен бастап жиырма күн өткен соң күшіне енеді.
Тамаша!🔥
2025 жылы наурызда қазақстандықтар жалпы 14 күн демалады
Наурызда Қазақстанда екі мемлекеттік мереке аталып өтеді. Олар 8 наурыз – Халықаралық әйелдер күні және Наурыз мейрамы.
Халықаралық әйелдер күніне байланысты аптасына бес күн жұмыс істейтін қазақстандықтар 8, 9 және 10 наурыз күндері демалады.
Алты күн жұмыс істейтіндер 8 және 9 наурыз күндері демалып, 10 наурызда жұмысқа шығады.
Наурыз мейрамы биыл демалыс күндеріне түсіп тұр. Сондықтан қазақстандықтар 21, 22, 23, 24 және 25 наурыз күндері қатарынан бес күн демалады.
Алты күн жұмыс істейтіндер үшін 25 наурыз — жұмыс күні, ал 21, 22, 23 және 24 наурыз демалыс күндері болады.
Демалысты қайда өткізесіз?😍
