Кеш жарық, құрметті оқырман!
Назарларыңызға бүгінгі күннің ең маңызды жаңалықтарын ұсынамыз ✅
17 наурызда Қазақстанда жұмысшы мамандықтарға арналған «Наурыз жұмыскер» ипотекалық бағдарламасы іске қосылады
Бұл туралы Сенатта “Отбасы банк” басқарма төрайымы Ләззат Ибрагимова мәлімдеді. Оның айтуынша, 17 наурыздан бастап “Наурыз жұмыскер” ипотекалық бағдарламасы өз жұмысын бастайды. Өтінімдер нақты уақыт режимінде қабылданады.
“Яғни, филиалға бірінші болып келген адам пәтер таңдап, несие рәсімдей алады”, – деді Ибрагимова.
Ипотекаға қатысу үшін үміткер жұмыс орны туралы анықтама ұсынуы қажет. Банк мамандары оның ЖСН (БСН) мен ұйымның қызмет саласын тексереді. Бағдарлама тау-кен өндірісі, энергетика, көлік және ауыл шаруашылығы салаларында жұмыс істейтін азаматтарға арналған.
Айта кетерлігі, бағдарламаға тек жұмысшы мамандық иелері ғана қатыса алады. Ал кәсіпорындардағы кеңсе қызметкерлері бұл ипотеканы рәсімдей алмайды.
Жақсы мүмкіндік екен!👍
Олжас Бектенов BI Group пен BAZIS компанияларын сынға алып, салық төлеуіне екі апта уақыт берді
Премьер-министр Олжас Бектенов BI Group, BAZIS және бірқатар кәсіпкерді сынға алып, оларды екі апта ішінде салықты әділ төлеуге міндеттеді.
Үкімет басшысы вице-премьер – Ұлттық экономика министрі Серік Жұманғаринмен және Қаржы министрі Мәди Такиевпен бірге жұмыс кеңесін өткізіп, салық-бюджет реформасы мен салық түсімдерін бақылауды күшейту мәселелерін талқылады.
Қаржы министрі Мәди Такиевтің айтуынша, жүргізілген талдау барысында кейбір компаниялардың арнайы салық режимдерін (СРП) пайдаланып, салық міндеттемелерін оңтайландыру мақсатында заңды айналып өтетін схемаларға жүгінетіні анықталған.
Қазақстанда 2,3 миллион салық төлеуші тіркелген. Бірақ олардың тек 8%-ы немесе 137 мыңы ғана – ҚҚС төлеушілер. Жалпы субъектілердің 81%-ы арнайы салық режимін пайдаланады, олардың 85%-ы жылдық табысы 15 миллион теңгеге дейінгі кірісті ғана көрсетеді.
“Біз арнайы салық режимдерін қолданатын компаниялардың жалпыға бірдей белгіленген режимдегі кәсіпорындармен есеп айырысуын зерттедік. Нәтижесінде, мұндай операциялар көлемі өткен жылы 2 есеге – 5 трлн теңгеден 10 трлн теңгеге дейін артқаны анықталды. Ал арнайы салық режимдеріндегі кәсіпорындардың жалпы айналымы 16 трлн теңгені құрайды, оның 10 трлн теңгесі жалпы режимдегі компаниялармен өзара есеп айырысуға тиесілі. Яғни, жүздеген миллиард теңге табатын кәсіпкерлер салықты аз мөлшерде ғана төлейді”, – деді Мәди Такиев.
Министрдің айтуынша, кейбір кәсіпкерлер салықтан жалтару үшін бірнеше заңды тұлғалар құрып, “құжаттық шығындарды” жасанды түрде арттыру әдісін қолданады.
Мысалы, бір компания тауарды сатып алып, оны жеңілдетілген салық режимінде жұмыс істейтін басқа заңды тұлғаға өзіндік құны бойынша қайта сатады. Нәтижесінде, бірінші компания шығынды көрсетсе, екіншісі ҚҚС төлеуден босатылады.
Тағы бір танымал тәсіл – бизнесті бірнеше шағын заңды тұлғаларға бөлу. Мысалы, бір ғимараттағы бар, асхана және караоке жеке компаниялар ретінде тіркеледі немесе қонақ үйдің әр қабаты әртүрлі жеке кәсіпкердің атында болады. Мұндай кәсіпкерлердің жылдық табысы 78 миллион теңгеге жеткенде, олар қызметін тоқтатып, орнына басқа заңды тұлға келеді. Осылайша, компаниялар ҚҚС төлеуден жалтарады.
Үкімет бұл мәселені бақылауға алып, алдағы екі апта ішінде ірі кәсіпкерлерден салық төлеуді әділетті түрде жүргізуді талап етті.
Қатаң тәртіп енгізіліп жатыр📌
Қазақстанда TikTok-қа шектеу қойылуы мүмкін
Оқу-ағарту бірінші вице-министрі Наталья Жұмаділдаева TikTok-тың балаларға әсері туралы пікір білдірді.
“Қытайда TikTok-ты әзірлеген компания балаларға бұл платформаны күніне небәрі 40 минут пайдалануға рұқсат береді. Сонымен қатар, ондағы контент қатаң реттелген – балаларға тек білім беру және дамуға арналған материалдар көрсетіледі”, – деді Жұмаділдаева Сенатта журналистер сұрағына жауап бере отырып.
Ол Қазақстанда да TikTok-қа шектеу қою мүмкіндігіне қатысты пікір білдірді.
“Егер заңнама аясында осындай бастамалар көтерілсе, біз оны қолдауға дайынбыз”, – деп мәлімдеді бірінші вице-министр.
Оқу-ағарту министрлігі бұл ұсынысты қолдайтынын жеткізді🔥 Ал сіз не дейсіз?
Қазақстанда 12 блогер 1,4 млрд теңге көлемінде қосымша табыстарын декларациялады
Бұл туралы Қаржы министрлігінің Мемлекеттік кірістер комитеті хабарлады.
Аталмыш шаралар барысында 12 блогер өз еркімен 1,4 млрд теңге көлемінде қосымша табыстарын декларациялап, 73,6 млн теңге салық төледі.
Бүгінгі таңда барлығы 854 блогерге «кірісті төмендету» бойынша заң бұзушылықтар үшін 71,9 млрд теңге сомасында камералдық бақылау туралы хабарламалар жіберілді.
Орындау мерзімі – 30 жұмыс күні.
Сонымен қатар 71,9 млрд теңге көлеміндегі айырмашылықтар төленбеген салықтардың сомасы емес екенін атап өткен жөн. Көрсетілген айырмашылық сомалары блогерлердің салық декларацияларында көрсетілмеген болжамды табыстарын білдіреді.
Салықтардың есептелуі мен төленуі салық заңнамасында белгіленген тиісті ставкалар бойынша ұсынылған декларацияларға сәйкес жүзеге асырылады.
Камералдық бақылаудың мәні – салық төлеушіге табыстарын өз еркімен декларациялап, есептелген салықтарды төлеуге немесе анықталған бұзушылықтармен келіспеген жағдайда түсіндірме беруге мүмкіндік беру.
Өз еріктерімен салық төлепті💸
