Бәріне сәлем!
Қыздар мен жігіттер, назарларыңа кезекті ТОП-3 жаңалықты ұсынамыз!✔️
1️⃣ Алматы музейлері түркі әлемінде үздік деп танылды
Түркия, Әзірбайжан, Қырғызстан, Өзбекстан, Түрікменстан және Қазақстан музейлері арасында түркі мәдениетінің халықаралық ұйымы ТҮРКСОЙ үздіктерді анықтады. Алматы қаласы музейлер бірлестігі “Best Museum of the Turkic World” жоғары марапатқа ие болды. Бұған музейтанушылардың елімізбен бірге шетелде ұлттық құндылықтар мен тарихи-мәдени мұраны насихаттау жөніндегі орасан зор жұмыстардың арқасында қол жетіп отыр. Бұл сертификатты ТҮРКСОЙ халықаралық ұйымының бас хатшысы Сұлтан Раев табыстады.
“Алматы музейлері соңғы екі жылдың өзінде үлкен жұмыс атқарғанын көріп отырмыз. Түркі елдерінің ғана емес, Еуропа мен Азияның тұрғындары қазір Алматы қаласы ұйымдастырған бірегей көрмелерді көре алады. Мысалы, Стамбул, Сеул, Прага, Неаполь, Вена және әлемнің басқа қалаларында Қазақстан көшпенділері туралы көшпелі көрмелер өткізілді. Өнер мен тарихқа әуестенушілер сіздер ұсынған жәдігерлер мен артефактілерге таң қалысты. Осылайша, сіздер қазақ мәдениетін шетелде белсенді түрде насихаттап, еліңізге туристерді тартасыз және түркі әлеміндегі музейді зерттеу саласындағы қызметті дамытып келесіздер. Қала билігі сала өкілдеріне бұрын-соңды болмаған қолдау көрсетіп жатқанын көріп отырмыз”, — деді Сұлтан Раев марапаттау барысында.
Құтты болсын!😍
2️⃣ Илон Маск әлемдегі ең бай адамдар тізімінде 235 миллиард доллар байлығымен көш бастады
Америкалық Amazon онлайн-ретейлерінің негізін қалаушы Джефф Безос бұрынғыша екінші орында, оның байлығы 193 миллиард долларға бағаланды. Үшінші орынға Meta корпорациясының басшысы Марк Цукерберг көтерілді, оның байлығы 188 миллиард долларды құрады.
Француз Арно 184 миллиард доллар активтерімен рейтингте төртінші орынға төмендеді. Осылайша, әлемдегі ең бай үш адам АҚШ азаматтары атанды.
Bloomberg 2012 жылдың наурыз айынан бастап планетадағы ең бай 500 адамның байлығы туралы ақпаратты қамтитын Bloomberg Billionaires Index-ті жариялап келеді.
ТОП-3 бай адамдар тізімінде америкалықтар тұр екен👍
3️⃣ Атыраулық түлектерлерге облыс әкімінің 148 білім гранты бөлінді
Биыл түлектерге Атырау облысы әкімінің 148 білім гранты бөлінді. Оған мемлекеттік білім грантын алмаған талапкерлер қатысқан.
Атырау облыстық білім басқармасының баспасөз қызметінен мәлім еткендей, әкімнің гранты 2017 жылдан бері беріліп келеді. Білім гранты жергілікті бюджет есебінен қаржыландырылады.
“Облыс әкімінің грантын берудің өзіндік тәртібі бар. Біріншіден, бұл мемлекеттік білім грантын иелене алмаған талапкерлерге арналған. Екіншіден, әкім грантын алу үшін өткізілетін конкурсқа мектеп және колледж түлектері қатысты. Үшіншіден, әкім гранты кадр тапшылығына байланысты сұраныс негізінде бөлінеді. Басты талап – мамыр-маусым айларындағы Ұлттық бірыңғай тестілеу қорытындысымен ережеге сәйкес құжаттарды тапсыру”, — деп хабарлады басқарманың баспасөз қызметі.
Басқарманың ақпаратына қарағанда, әкім грантымен оқыған студенттер жоғары оқу орнын бітіргеннен кейін жауапты мекеменің берген жолдамасымен жұмысқа орналаса алады. Биыл білім грантын бөлу кезінде медицина, педагогика, ауыл шаруашылығы, ветеринария, орман ресурстары және орман шаруашылығы, дінтану, туризм бағытындағы мамандықтар таңдалды.
Мәселен, педагогика, бейнелеу өнері және көркем еңбек, музыкалық білім, ветеринария, дене шынықтыру және спорт, туризм және сервис мамандығының грантын иеленгендер Х.Досмұхамедов атындағы Атырау университетінде жоғары оқиды.
Әкім грантының басым бөлігі медицина саласына маман даярлауға бөлінген. Енді атыраулық түлектер Астана, Алматы, Қарағанды және Ақтөбе қалаларындағы медицина университетінде жалпы медицина мамандығында білім алады. Ал, дінтану, теология мамандығы үшін берілген грант иелері Нұр-Мүбарак Египет Ислам мәдениеті университетінің студенті атанды.
Тамаша!🔥
