🕺19 қараша – Халықаралық ерлер күні. Бұл күннің мақсаты — ерлер қауымының отбасындағы және қоғамдағы рөлін ерекше атап өтуге бағытталған. Сонымен қатар мереке ұлдар мен ерлердің денсаулығын сақтауға, олардың әлеуметтік, эмоцияналдық, физикалық және рухани салауатын арттыруға, ерлер мен әйелдер арасындағы гендерлік қарым-қатынасты жақсартудың маңызын еске салады.
Ер адамдарды атаулы мерекемен құттықтаймыз!
💼19 қараша — Халықаралық кәсіпкер әйелдер күні. Көптеген әйел тұрмыс құрғаннан кейін отбасылық өмірге толық бет бұрып, мансап жолынан бас тартып жатады. Бірақ олардың арасында іскер әрі кәсіпкерлік қабілетке ие, жаңа тауарлар мен қызметтерді жасауға икемді әйелдер қауымын ерекше атап өтуге болады. Мәселен, бүгінде еліміздегі жеке кәсіпкерлердің жартысын қазақстандық әйелдер құрайды. Олар заңды тұлғалардың 30%-ын, ал шаруа қожалықтарының 25%-ын басқарады.
Барлық іскер әйелдерді осы мерекемен шын жүректен құттықтаймыз!
👀Бүгін – Дүниежүзілік дәретхана күні. Бұл күн адамзатқа әлемдегі өзекті мәселелердің бірін еске салады: 3,6 миллиард адамның баспанасында дәретхана жоқ немесе дәретханалары бар болса да, қауіпсіздік шараларына толық бейімделмеген. Ал әлем бойынша мектептердің 30%-ында дәретхана жоқ, яғни 900 миллионнан астам оқушы санитарлық жағдайдың болмауынан дәретханадан кейін қолдарын жуа алмайды. Мұндай ахуал түрлі аурудың таралуына себеп болып, күн сайын бес жасқа дейінгі 700-ден астам бала диарея салдарынан көз жұмады. Бұл мәселе Қазақстан үшін де өзекті. Жыл сайын елімізде бірқатар мектеп дәретханасының сыртта орналасуына байланысты мәселелер көтеріліп келеді.
Гигиена ережелерін сақтау – денсаулықтың негізгі кепілі. Сондықтан үнемі өзіңізге және жақындарыңызға қамқорлық танытыңыз!
👥19 қараша – әйгілі екі әйелдің туған күні. 74 жыл бұрын қазақ суретшісі әрі мультфильмдер қоюшысы Раушан Мамбекова (1950–2012) дүниеге келді. Оның еңбектері Қазақстан, Польша, Франция, Түркия, АҚШ, Германия, Нидерланды және Үндістан сынды елдердің жеке коллекцияларында сақтаулы тұр. Өнер иесі Францияда өткен Халықаралық көрме-байқауында алтын медальмен марапатталған. Сонымен қатар ол “Қонжық”, “Бір таңғажайып достықтың тарихы” және “Бұл ақша салынған қап” мультфильмдерінің қоюшысы ретінде де танымал. Сондай-ақ бүгін америкалық актриса, екі мәрте “Оскар” сыйлығын және төрт мәрте “Алтын глобус” жүлдесін иеленген Джоди Фостер 62 жасқа толды. Ол “Молчание ягнят”, “Комната страха” және “Иллюзия полёта” фильмдеріндегі рөлімен танымал болды. 1981 жылы өнер иесінің есінен адасқан жанкүйері актрисаның назарын аударту мақсатында АҚШ президенті Рональд Рейганға қастандық жасаған болатын.
#күнтізбе #19қараша #ерлер
