👮♀️Бүгін — Қазақстанның жол полициясы күні. Егеменді Қазақстанда Мемлекеттік автоинспекция туралы алғашқы ереже 1992 жылы 23 қарашада ҚР Министрлер Кабинетінің Қаулысымен бекітілді. 1996 жылы жол қауіпсіздігін қамтамасыз етуге қоғамдық тәртіпті сақтау, қылмыспен күрес, жол қозғалысы қауіпсіздігін қамтамасыз етумен қатар азаматтарды жолдағы кез келген қылмыстық қауіп-қатерлерден қорғау міндеттері қосылып, Мемлекеттік автоинспекция Жол полициясы болып аталды. 2013 жылы Жол полициясы Әкімшілік-патрульдік полициямен біріктіріліп, оның әмбебабын арттырды.
Жол сақшыларын білсеңіз, мерекесімен құттықтап қойыңыз!
👏Бүгін Халықаралық жазасыздықпен күрес күні аталып өтеді. 2009 жылы 23 қарашада Филиппинде 58 адам ұрланып, ажал құшты. Оның ішінде 32 журналист болды. Бұл — тарихта БАҚ қызметкерлеріне қарсы соңғы рет жасалған ең ауыр қылмыс. Аталмыш күннің мақсаты — сөз бостандығы құқығын пайдаланғаны үшін қуғын-сүргінге ұшыраған адамдардың әділдігіне қол жеткізу, сондай-ақ ауыр қылмыс жасаған адамдардың жазасын алу мәселесіне қоғамның назарын аудару.
Сіз осындай бастамаларды қолдайсыз ба?
💪Қарашаның төртінші сенбісінде Украинада ашаршылық құрбандарын еске алу күні аталып өтеді. 2006 жылы Украина Парламенті кеңестік биліктің тоталитарлық саясатының нәтижесін украин халқының геноциді деп таныды, бұл бірқатар мемлекеттер мен халықаралық ұйымдар тарапынан да мойындалды. Украинаның демография институтының зерттеуіне сәйкес, Украинада ашаршылық салдарынан 3 миллион 917,8 мың адам, Ресейде 3 миллион 264,6 мың адам, Қазақстанда 1 миллион 258,2 мың адам қайтыс болғаны жазылған. Аштықтан болған салыстырмалы шығындар Қазақстанда — 22,42 %, Украинада — 12,92 %, Ресейде — 3,17% болды. Қазақстанда саяси қуғын-сүргін және ашаршылық құрбандарын еске алу күні 31 мамырда аталып өтеді.
👥23 қарашада өмірге келген танымал ер адамдар. Бүгін «Қазақ Далиі» атанған суретші Есімғали Жұманов 78 жасқа толды. Ол 200-ден астам танымал туындының авторы. Оның жұмысы Парижде, Тегеранда, Мәскеуде, Магдебургте өткен халықаралық көрмелерде қойылды. Өнер иесінің жұмысында суреттер мистикалық сюрреализммен үндеседі. Ол қазақ суретшілерінің бірнеше буынын білім нәрімен сусындатқан ұстаз. Сондай-ақ бүгін француз актері әрі продюсері Венсан Кассель 58 жасын атап өтеді. Ол 70-тен астам фильмде ойнап, өзінің туған жері Францияда және Голливудта кең танымалдыққа ие болды. Табиғи таланты мен ерекше харизмасының арқасында Венсан Кассель еуропалық кинодағы “басты бұзақы” атанып, әлемге әйгілі тұлғаға айналды.
Сізге Венсан Кассельдің қай фильмі ұнайды?
