📚24 қазанда Қазақстанда Кітапханашылар күні аталып өтеді. Елімізде 10 мыңнан астам кітапхана бар, онда 20 мыңға жуық кітапханашы қызмет етеді. Кітапхана – адамның жұмыс пен үйден тыс жерде мәдени әрі білім беру қажеттіліктерін қанағаттандыратын “үшінші орын”. Кітапханашылар кәсібі арқылы әлемдік мәдени мұраны сақтап, осы саладағы ғасырлық дәстүрлерді жалғастырып келеді.
Таныс кітапханашыларды білсеңіз, мерекесімен құттықтауды ұмытпаңыз!
😁Бүгін — БҰҰ күні. 1945 жылы 24 қазанда Біріккен Ұлттар Ұйымының жарғысы күшіне енді. Бұл әлемдік тәртіпті сақтау үшін құрылды. Қазіргі уақытта БҰҰ құрамында 193 мемлекет бар. Ұйымның басты органдары: Бас Ассамблея, Қауіпсіздік Кеңесі, Экономикалық және Әлеуметтік Кеңес, Қамқорлық кеңесі, Халықаралық сот және Хатшылық. Қазақстан 1992 жылдың 2 наурызында БҰҰ-ға мүше болып қабылданды. Бұл еліміздің халықаралық қатынастардың толыққанды субъектісі болғанын білдіреді.
👀24 қазан — Дүниежүзілік полиомиелитке қарсы күрес күні. Бұл күн полиомиелитке қарсы алғашқы вакцинаны жасаған америкалық вирусолог Джонас Салктың (1914-1995) туған күніне орай белгіленген. Полиомиелит – жүйке жүйені зақымдап, толық сал болуға әкелетін вирус. Аталмыш ауру XX ғасырдың ортасында көптеген елде белең алды, оны емдеу мүмкін емес еді. Әсіресе, бес жасқа дейінгі балалардың жұқтырып алу қауіпі жоғары. 2002 жылы ДДСҰ Қазақстанды полиомиелиттен таза ел ретінде таныды. Себебі балаларымыздың 98,6 пайызы осы вирусқа қарсы вакцина алған.
👥24 қазанда бильярд әуесқойлары күні аталып өтеді. Бұл ойын ежелгі қытай мен Үндістанда пайда болды. Ал Еуропада алғашқы бильярд үстелі Людовик XI үшін жасалды. Содан кейін бильярд ақсүйектерге арналған міндетті білім беру бағдарламасының бөлігіне айналды. Уақыт өте келе оның танымалдығы кең етек жайды. Бірақ бильярд үстелінің көлемі мен оның қымбат болуы халықтың күнделікті хобби ретінде айналысуына мүмкіндік бермеді. Ал қазіргі таңда салыстырмалы түрде оның бағасы қолжетімді болғандықтан, осы тамаша мерекені тойлайтын орындар жеткілікті.
Егер таныстарыңыздың арасында бильярд әуесқойлары болса, оларды мерекесімен құттықтауды ұмытпаңыз.
#күнтізбе #24қазан #кітапхана
