👤3 желтоқсанда БҰҰ бастамасымен Халықаралық мүгедектер күні аталып өтеді. Дүниежүзінде миллиардқа жуық адам мүгедектіктен зардап шегуде. Оның 700 мыңға жуығы — қазақстандықтар. Олардың барлығы көп жағдайда физикалық, әлеуметтік-экономикалық және мінез-құлық кедергілеріне тап болып жатады. Ал бұл ерекше қажеттілігі бар жандардың қоғамға толыққанды сіңісуіне кедергі жасайды. Бұл күннің мақсаты – мүгедектердің негізгі мәселесіне назар аударып, олардың қадір-қасиеті мен құқықтарын қорғау.
🗣3 желтоқсанда Дүниежүзілік компьютерлік графика күні аталып өтеді. Бұл күн кездейсоқ таңдалмаған — 3D дегеніміз 3 December деген мағынаны білдіреді. 1998 жылдан бастап бұл күн тек үшөлшемді бейнелер жасаушылардың кәсіби мерекесі ретінде аталып келді, бірақ уақыт өте келе ол компьютерлік графикамен байланысты басқа да салаларды қамтыды. Бүгінгі таңда Adobe, nVidia, Wacom сынды ірі халықаралық компаниялар бұл күнді ерекше атап өтіп, әлемнің әртүрлі қаласында шеберлік сабақтары, қызық таныстырылымдар және әртүрлі саладағы танымал тұлғалармен онлайн сұхбаттар ұйымдастырады. Тіпті бұл мерекеге үйіңізден шықпай-ақ, интернет арқылы қатысуға болады. Соңғы жылдары бұл күн Қазақстанда да белсенді түрде атап өтіле бастады.
Егер таныстарыңыздың арасында 3D-графика және дизайн мамандары болса, кәсіби мерекелерімен құттықтауды ұмытпаңыз.
👀1992 жылы 3 желтоқсанда алғашқы SMS жіберілді. Тарихи хабарламаның авторы — 22 жастағы бағдарламашы Нил Папуорт. Мәтінде: “Merry Christmas!” деп жазылды. Ал қазіргі таңда SMS күнделікті өмір мен бизнесте үлкен рөл атқарады. Мұнда пайдаланушыға «мобильді банк» қызметін қолдану, банк операцияларын жүргізу бойынша код жіберу, ТЖ ескертулерін алу, көптеген интернет-ресурстарда тіркелу мүмкіндіктері ашылды. Алайда СМС-тің жағымсыз тұстары да бар. Яғни, алаяқтар жарнамалық пошта мен құпия ақпаратты білу үшін арнайы хабарламалар жіберуі мүмкін.
👥3 желтоқсанда өмірге келген қазақтың танымал тұлғалары. Бүгін опера әншісі әрі музыка саласының педагогы Қанат Омарбаев 81 жасқа толды. Өнер иесі Польша, Чехословакия, Венгрия, Германия, Вьетнам, Корея, Моңғолия, Ресей мемлекеттерінде қазақ опера өнерін көпшілікке ұсынды. Ол — кәсіби және мемлекеттік марапаттардың иегері. Сондай-ақ 76 жыл бұрын кино және театр актрисасы Ғазиза Әбдінәбиева (1948-2021) дүниеге келді. Ол Қазақстанда алғаш түсірілген «Тоғысқан тағдырлар» және «Қара шегіртке» телесериалдарынан Роза апай мен Марго кейіпкері ретінде танымал. Мансап жолында ол 16 фильмге түсті. Театрдағы гастрольдік сапарымен Қазақстанның көптеген қаласына, ТМД елдеріне, Германия мен Иранға барды.
