🤩Бүгін әлемде бейбітшілік сағаты күні аталып өтеді. Мерекенің мақсаты — жыл соңында ең болмағанда бір сағатқа жанжал мен кикілжіңдерді тоқтатып, бейбіт шешім іздеуге ден қою. Бұл — символдық күн. Сондықтан әлемде орын алып жатқан түрлі жағдайды ескере отырып, соғыстар мен қақтығыстарға ықпал еткен қиындықтарды ескі 2024 жылы қалдырған жөн. Ал қарапайым адамдар үшін бүгінгі күн – жыл бойы ренжіскен жандармен татуласуға тамаша себеп.
Ұлу жылы әлемде соғыс болмасын!
💃2013 жылғы 31 желтоқсанда Еуропалық бизнес ассамблеясы мен Еуропа ректорлар клубы, 54 елдің ғылыми элитасын таныстыра отырып, техника ғылымдарының докторы Марат Нұрғужинді “Әлем ғылымына қосқан үлесі үшін” даңқ орденімен марапаттап, оған “Ғылымдағы есім” құрметті атағын табыстады. Профессор 250 ғылыми мақала, 7 патент, 4 монография, 9 оқулық пен оқу құралдарының авторы. Сондай-ақ ол 5 ғылым кандидаты мен 1 ғылым докторын және 40-тан астам магистрантты даярлап шығарған.
💪31 желтоқсан – Шешім қабылдау күні. Көп жағдайда адамдар маңызды шешім шығаруды кейінге қалдырып жатады. Дегенмен жаңа жыл әрбір адамның үлкен әрі сенімді қадам жасауы үшін жаңа мүмкіндік береді. Бірі бұл күні тұрғылықты жерін өзгертіп жатса, енді бірі жұмыс орынын ауыстырады. Тіпті мерекелік үстелде үйленуге ұсыныс та жасайтындар табылады. Сондықтан жылдың соңғы күні ерік-жігеріңізді іске қосып, ойлап жүрген ісіңізді дөңгелетіп әкетуіңіз үшін таптырмас мүмкіндік.
Жаңа жылда жаңа бастамаларыңызға сәттілік тілейміз!
👥31 желтоқсан — танымал қос тұлғаның туған күні. 111 жыл бұрын қазақ кітаптану ғылымының негізін қалаушы Әбусағит Жиреншин (1913-1975) дүниеге келді. Абай шығармашылығының алғашқы зерттеушілерінің бірі баспа және мұражай ісінің дамуына айтарлықтай үлес қосты. Қазақ халқының этнографиясы бойынша материалдар жинап, республикада кітапхана ісінің өркендеуіне ықпал етті. Қала берді алғашқы Қазақстан энциклопедиясын құруға белсене қатысты.
Сондай – ақ бүгін актер, режиссер әрі продюсер сэр Энтони Хопкинс 87 жасқа толды.
«Оскар» сыйлығының екі дүркін иегері көпшілікке «Молчание ягнят”, “Ганнибал” және “Красный дракон” фильмдеріндегі каннибал-доктор Ганнибал Лектердің рөлімен әлемге танылды. 1987 жылы Елизавета II патшайымы Хопкинсті Британ империясының орден командоры атағымен марапаттап, 1993 жылы оған “сэр” титулын берді.
