Бәріне сәлем!
Қыздар мен жігіттер, назарларыңа кезекті ТОП-3 жаңалықты ұсынамыз!✔️
1️⃣ «Медеу» мұз айдынының жаңа маусымы 2 қарашада ашылады
Ашылу күні №12 автобус бағытын «Медеу» биік таулы мұз айдынына дейін ұлғайту жоспарланып жатыр.
Медеуде жаңа жаппай сырғанау маусымы қашан басталатыны белгілі болды. Бұл туралы әкімдіктің баспасөз қызметі хабарлады.
Алматыда 1 қарашада «Медеу» мұз айдыны техникалық режимде іске қосылады, оған барлық тілек білдірушілер сеанс кестесіне сәйкес бара алады.
2 қарашада «Медеу» биік таулы мұз айдынында жаппай сырғанаудың жаңа маусымының салтанатты ашылуы өтеді.
«Салтанатты ашылу бағдарламасы сағат 12:00-ден 15:30-ға дейін жалғасады. Келушілер үшін қазақстандық эстрада жұлдыздарының қатысуымен концерттік бағдарлама қарастырылған. Кешкі сағат 17.00-ден 20.00-ге дейін қонақтар конкурстарға қатысып, кешті жүргізуші мен диджейдің сыйлықтарын алады және дискотекаға қатысады. Жаңа маусымда келушілерді күнделікті жаппай сырғанау сеанстары, мерекелік іс-шаралар және спорттық жарыстар күтеді. Ниет білдірушілер конькиді жалға алып, демалыс аймағын пайдалана алады. Қонақтарға ыңғайлы болу үшін мұз айдыны аумағында фастфуд пункттері ұйымдастырылады», – делінген хабарламада.
Алматы спорт ғимараттарының дирекциясы қала тұрғындары мен қонақтарына кассалардағы кезектерді болдырмау және турникет жүйесі арқылы жылдам өтуді ұйымдастыру, кептелістер мен тұрақ қиындықтарын болдырмау үшін билеттерді www.medeu.kz ресми сайт арқылы сатып алуды және қоғамдық көліктерді пайдалануды ұсынады.
Ашылу күні №12 автобус бағытын «Медеу» биік таулы мұз айдынына дейін ұлғайту жоспарланып жатыр.
Автобустар жұмыс күндері сағат 8:00-ден 00:00-ге дейін және демалыс күндері сағат 8:00-ден 01:00-ге дейін жүреді. Көлік жүретін орындарды 2GIS қызметінен табуға болады.
Сіздер де күтіп жүрсіздер ме?😍
2️⃣ Испаниялық Родри футболдан 2024 жылғы «Алтын доп» иегері атанды
“Манчестер Сити” және Испания құрамасының жартылай қорғаушысы Родриго Эрнандес Касканте France Football нұсқасы бойынша 2024 жылдың үздік футболшысы атағына ие болды.
Бұған дейін ол Еуропа чемпионатының ең үздік ойыншысы деп танылған. “Алтын доп” үшін бәсекеде Родри мадридтік “Реалдың” шабуылшысы Винисиус Жуниорды артта қалдырды. Сонымен қатар үздік бестікке Джуд Беллингем, Даниэль Карвахаль және Эрлинг Холанд кірді. Ал үздік ондықта Килиан Мбаппе, Лаутаро Мартинес, Ламин Ямал, Тони Кроос және Харри Кейн болды.
Родри бұл жүлдені жеңіп алған үшінші испандық ойыншы атанды. Оған дейін Альфредо Ди Стефано (1957, 1959) және Луис Суарес Мирамонтес (1960) осындай мәртебеге ие болған. Былтырғы жылы ол дауыс беру нәтижесінде бесінші орын алған еді, ал биыл екінші мүмкіндігінде “Алтын допты” жеңіп алды.
2023/2024 маусымында Родри “Манчестер Сити” сапында қатарынан төртінші рет Англия чемпионы атанып, клубтық әлем чемпионатын ұтып алды. Испания құрамасымен Еуро-2024 турнирінде жеңіске жетіп, турнирдің үздік ойыншысы атанды.
Родридің жанкүйерлерін құттықтаймыз!🔥
3️⃣ Жәмила Бақбергенова әлем чемпионатында жартылай финалға шықты
Албания астанасы Тиранада өтіп жатқан әйелдер күресінен олимпиадалық емес салмақтағы әлем чемпионатында қазақстандық Жәмила Бақбергенова жартылай финалға жолдама алды.
Қазақстандық балуан 72 келі салмақта ширек финалда чехиялық Адела Нанзликованы 6:3 есебімен жеңді. Одан бұрын Жәмила молдовалық Эмилия Кречуннан басым түскен еді.
Өкінішке қарай ел құрамасынан Зульфия Яхьярова (55 келі), Диана Каюмова (59 келі) және Ирина Казюлина (65 келі) алғашқы белдесуінде жеңіліп қалды.
Спортшымызға жеңіс тілейміз!🙌🏻
