Кеш жарық, қыздар мен жігіттер!
Назарларыңызға бүгінгі күннің ТОП-3 жаңалығын ұсынамыз✅
1️⃣ Рахат-Би Әбдісағин 2024 жылы Лондонның Құрметті музыканттар қауымдастығының беделді марапатын алған алғашқы қазақстандық атанды
Ғылым және жоғары білім министрлігінің мәліметінше, бұл Ұлыбританияның ең көне және маңызды марапаттарының бірі. Салтанатты марапаттау рәсімі қараша айының ортасында Ұлыбритания астанасында өтті.
1889 жылы негізі қаланған Күміс медаль жыл сайын Ұлыбританияның жетекші консерваторияларының ең үздік жас музыканттарына беріледі.
2024 жыл Рахат-Би Әбдісағиннің шығармашылық мансабындағы айтулы жыл болды. Ақпан айында ол Ұлыбританияның төрт соборында The Bruce операсының әлемдік премьерасын ұсынды. Бұл опера Рахат-Бидің «Болашақ» бағдарламасы бойынша Шотландияның Корольдік консерваториясы мен Сент-Эндрюс университетіндегі докторлық зерттеуінің маңызды бөлігі болып табылады, — делінген мәліметте.
Сонымен қатар Рахат-Бидің «Кванттық механика және авангардтық музыка» атты кітабы немістің беделді Springer баспасынан жарық көрді. Физика мен эксперименталды музыканың тоғысқан жеріндегі бұл бірегей зерттеу ғылыми және музыкалық ортада үлкен қызығушылық тудырды. Автор кітабын Нидерланд пен Германияның жетекші университеттерінде, соның ішінде Гейдельберг пен Амстердамда таныстырды. Бұдан бөлек, кітап Ұлыбританияның ең танымал және ірі кітап дүкендерінің бірі — Оксфордтағы басты кітап дүкенінің сөрелерінен орын алды.
Математика, физика және музыканың арасындағы терең байланысты көрсете алғаныма қуаныштымын. Бұл өнер мен ғылымдағы жаңа идеяларға шабыт береді, — деді композитор таныстыру барысында.
Құтты болсын!🔥
2️⃣ 30 қараша күні Қазақконцертте “Алдар көсе” мюзиклы өтеді
Қазақконцерт мәліметінше, “Алдар көсе” мюзиклының премьерасын 2022 жылдың желтоқсан айында Орталық Азиядағы тұңғыш “ASTANA MUSICAL” мемлекеттік мюзикл театры ұсынған болатын.
“Қойылымның сюжетінде қазақ халқының жарқын, қызықты және тағылымды көрінісі баяндалады. Сондай-ақ мюзикл халық батырының мәңгілік бейнесін жасауға, мықты тұлға ретінде қалыптастыруға, адамгершілік-рухани құндылықтарды, даналық пен тапқырлықты дәріптеуге бағытталған. Басты кейіпкер кедейлерді зұлымдық пен сараң байлардан қорғап жүреді. Әрі шапшаң, әрі жүйрік Алдар көсе үнемі қиын жағдайлардан шығып кетуге тырысады”, — делінген мәліметте.
Мюзиклдың қоюшы-режиссеры – «Astana Musical» мемлекеттік театрының көркемдік жетекшісі Есләм Нұртазин, қойылымның авторлары – Ефрат Шарипов, Шыңғыс Маман, Есләм Нұртазин, Әннәс Бағдат, композитор – Ербол Нариманұлы, Ақжол Өмірзақов.
Сіздер де тамашалап қайтыңыздар!😍
3️⃣ Қазақстанда әскери қызметке запастағы офицерлер шақырылады
Қазақстанда екі жыл мерзімге әскери борышын өтеуге запастағы офицерлер шақырылады.
Әскери қызмет және әскери қызметшілердің мәртебесі туралы» Қазақстан Республикасы Заңының 32-бабына сәйкес, офицер құрамының лауазымдарында әскери қызмет өткеру үшін әскери қызметке жарамды және оны өткермеген запастағы офицерлер заңнамада белгіленген тәртіппен 2025 жылы жиырма төрт ай мерзімге әскери қызметке шақырылады.
Қарулы Күштер қатарына 700 адамды, Ұлттық қауіпсіздік комитетінің Шекара қызметіне 80 адамды, Ішкі істер министрлігінің Ұлттық ұланына 131 адамды, Төтенше жағдайлар министрлігіне 4 адамды шақыру жоспарланған. Келер жылы барлығы 915 запастағы офицер шақырылады.
Жаңа заң енгізіліпті🤔
