Бәріне сәлем!
Қыздар мен жігіттер, назарларыңа кезекті ТОП-3 жаңалықты ұсынамыз!✔️
1️⃣ Францияның әйгілі Гиме музейінде “Қазақстан: Ұлы Дала жауһарлары” көрмесінің салтанатты ашылуы өтті
Ашылу салтанатында Қазақстан Республикасының Мәдениет және ақпарат министрі Аида Балаева әлем тарихындағы Ұлы даланың үш мың жылдық ерекше мәдени феноменін паш ететін көрмедегі бірегей экспонаттардың маңыздылығын атап өтті.
Ол француз әріптестеріне көрмені ұйымдастыруға қолдау көрсеткені үшін алғыс білдіріп, Қазақстан мен Франция арасындағы мәдени қарым-қатынастың маңыздылығына ерекше тоқталды.
«Кейінгі жылдары Қазақстан мен Франция арасындағы байланыс артып, жаңа серпін алды. Қазақстан Президенті Қасым-Жомарт Тоқаев пен Франция Президенті Эммануэль Макронның өзара сапарлары екіжақты ынтымақтастықты нығайта түсті. Әріптесім, министр ханым Рашида Дати мен Гиме музейінің президенті, доктор Янник Линтцке осы көрмені ұйымдастыруда көрсеткен қолдауы үшін, сондай-ақ, Гиме музейі ұжымына жоғары деңгейдегі кәсіби біліктілігі мен үйлесімді жұмысы үшін ерекше алғысымды білдіремін», – деді Аида Балаева.
Экспозицияда Қазақстанның Ұлттық музейі мен «Әзірет Сұлтан» музей-қорығының коллекцияларынан алынған 35 сирек артефакт ұсынылған. Олар Қазақстан тарихының негізгі кезеңдерін паш етеді.
«Музейдің биік миссиясы – өткеннің мәдени құндылықтарын көрсете отырып, заманауи тарихты жасау. Көрмеге қойылған ең құнды жәдігерлер алғаш рет шетелдік көрерменге заманауи, жаңашыл форматта ұсынылып отыр. Бүгін біз жаңа тарихтың – елдеріміз арасындағы қарым-қатынастардың даму тарихының куәсі болып отырмыз», – деді министр.
Тамаша! Сонымен қатар бүгін Парижде әнұрамыз шырқалды🔥
2️⃣ Алматыда хоккейден тарихи Азия чемпионаты өтеді
Халықаралық хоккей федерациясы (ИИХФ) аясында тарихта тұңғыш рет хоккейден Азия чемпионаты өтеді.
Ұлттық олимпиадалық комитеттің мәліметінше, турнир 2024 жылғы 6-9 қарашаға жоспарланған. Чемпионат Алматыдағы Halyk Arena стадионында өтпек.
Қазақстан құрамасының қарсыластары Жапония, Корея және Қытай командалары болады. Соңғы рет Halyk Arena-да халықаралық хоккей жарыстары 2017 жылғы Универсиада аясында өткен. Ол кезде біздің студенттік құрама күміс жүлделерді еншілеген болатын.
Еске салсақ, хоккейден әйелдер арасындағы Азия чемпионаты 2024 жылғы 31 қазан мен 3 қараша аралығында Қытай астанасы Бейжіңде өтеді. Чемпионатқа Қазақстан, Жапония, Корея және Қытай елдерінің құрамалары да қатысады.
Спортшыларымызға сәттілік тілейміз!🙌🏻
3️⃣ Netflix стримингтік компаниясының кеңселеріне ауқымды тексеріс жүргізілді
Тергеушілер Netflix стримингтік компаниясының кеңселерінде салық қылмыстары мен ақша жымқыруға қатысты алдын ала тергеу аясында тінту жүргізді.
Француз сот жүйесі дереккөзінің мәліметінше, сейсенбі күні таңертең қаржы қылмыстарын зерттейтін құқық қорғау органдары Париждің орталығында орналасқан корпорацияның кеңсесінде тінту жүргізді. Дәл осы сәтте Нидерланды билігі де Амстердамдағы Netflix-тің еуропалық штаб-пәтерінде тінту жүргізді.
Қаржы қылмыстарын зерттейтін құқық қорғау органдары бірнеше елде тінту жүргізіпті🤔 Аманшылық па?!
