Кеш жарық, қыздар мен жігіттер!
Назарларыңызға бүгінгі күннің ТОП-3 жаңалығын ұсынамыз✅
1️⃣ Қазақстандық оқушы қыз шахматтан екі дүркін әлем чемпионы атанды
Елордадағы №91 мектеп-гимназиясының 5-сынып оқушысы Аланна Берікқызы шахматтан (U8-U12) Италияда өткен халықаралық жарыста екінші рет әлем чемпионы атанып отыр.
Қаршадай қыз өткен жылы Грекияда 9 жасқа дейінгі шахматшылар арасында ұйымдастырылған әлем чемпионатында ел намысын абыроймен қорғап, жеңімпаз атанған еді.
Осылайша, астаналық оқушы шахматтан екі дүркін әлем чемпионы болды.
Айта кетейік, Астана әкімі Жеңіс Қасымбектің жас шахматшылармен кездескені отандық БАҚ-та хабарланған болатын.
Құтты болсын!😍
2️⃣ 2025 жылы “Алматы жастары” бағдарламасымен үй алатын жастар саны артпақ
Алматыда қалалық мәслихаттың XXIV сессиясы өтіп, онда 2024-2026 жылдарға арналған бюджетке бірқатар өзгеріс енгізілді.
Сессия барысында Қаржы басқармасының басшысы Қанат Сухамбеков “Алматы жастары” бағдарламасын қаржыландыруды ұлғайтуға ұсыныс жасады. Оның айтуынша, қосымша бөлінетін 1,4 миллиард теңге жас мамандар үшін 80 ипотекалық несие беру мүмкіндігін қамтамасыз етеді. Бағдарламаға әлеуметтік, құқық қорғау, коммуналдық және басқа да маңызды салаларда еңбек ететін азаматтар қатыса алады.
Сонымен қатар ішкі істер органдарының 2 510 қызметкерінің тұрғын үй мәселесін шешу үшін жергілікті бюджеттен тағы 2,5 миллиард теңге қаражат бөлу жоспарланған.
Сессия қорытындысы бойынша депутаттар ұсынылған өзгерістерді мақұлдады.
Тамаша!👍
3️⃣ Қазақстандықтардың желтоқсанда неше күн демалатыны белгілі болды
Тәуелсіздік күніне орай қазақстандықтар қосымша демалысқа шығады.
• Бес күндік жұмыс аптасында – 14, 15 және 16 желтоқсан демалыс күндері;
• Алты күндік жұмыс аптасында – 14 желтоқсан жұмыс күні болып қалып, 15 және 16 желтоқсан демалыс күндері белгіленеді.
Сондай-ақ желтоқсан айында кәсіби және басқа да маңызды күндер аталып өтеді. Бұл мерекелер жұмыс күндері мен демалысқа қарамастан атап өтіледі.
Қазақстан Республикасының Еңбек және халықты әлеуметтік қорғау министрінің м.а. 2023 жылғы 17 қарашадағы №480 бұйрығына сәйкес, желтоқсандағы кәсіби мерекелердің тізімі:
• 5 желтоқсан – Адвокатура күні;
• 6 желтоқсан – Прокуратура күні;
• 15 желтоқсан (желтоқсанның үшінші жексенбісі) – Энергетика күні;
• 20 желтоқсан – Мемлекеттік фельдъегерлік қызмет күні;
• 22 желтоқсан – Мұрағатшылар күні.
Тәуелсіздік күні мемлекеттік мерекесі елімізде 16 желтоқсанда, яғни дүйсенбіде аталып өтеді✔️
