Кеш жарық, қыздар мен жігіттер!
Назарларыңызға бүгінгі күннің ТОП-3 жаңалығын ұсынамыз✅
1️⃣ Жаңа жылда адамдар аспаннан солтүстік шұғыласын тамашалай алады
Ғарыштық зерттеулер институтының күн астрономиясы зертханасы жаңа жыл қарсаңында солтүстік шұғыласының байқалуы мүмкін екенін хабарлады.
Ғалымдардың мәліметінше, таңғы сағат 7:14 пен 7:31 аралығында күн бетінде бірден екі қуатты X класты рентген жарылысы тіркелген. Бұл жарылыстар күн дискісінің батыс бөлігінде, ықпалы қайта сезілуі мүмкін аймақта орын алған. Биылғы күн белсенділігі ішінде бұл жарылыс ең күштілердің бірі деп саналады. Бұған дейін мұндай серпілістер мамыр және қазан айларында байқалған.
Есептеулер бойынша, күннен бөлінген массалық шығарындылар 31 желтоқсан күні жерге жетіп, солтүстік шұғыласын тудыруы ықтимал. Шұғыла жаңа жыл түні де көрінуі мүмкін.
Мына көріністі міндетті түрде көруге тырысыңыздар😍
2️⃣ Қазақстанда доллар сатып алу көлемі 228,1 млрд теңгеге дейін өсті
Бұл желтоқсан айынан бері тіркелген ең жоғары көрсеткіш.
Долларға сұраныс ең көп Алматы қаласында болды. Мұнда нетто-сатылым 63,7 млрд теңгеге жетіп, жалпы сатылымның 28%-ын құрады.
Екінші орында Шымкент қаласы тұр – 57,5 млрд теңге. Осы екі қала еліміздегі доллар сұранысының жартысынан астамын қамтыды.
Еуро нетто-сатылымы да 27,3%-ға артып, 22,9 млрд теңгені құрады.
Ал рубль көрсеткіштері, керісінше, 44,3%-ға төмендеп, 4,9 млрд теңгеге дейін азайды.
Мәссаған, ал сіз доллар сатып алдыңыз ба?🤔
3️⃣ Ұлттық банк Қазақстан футболына арналған коллекциялық монеталарды шығарады
Қазақстан Ұлттық банкі «Спорт» сериясынан «Қазақстанның футбол клубтары» және «Қазақстанның футбол федерациясы» коллекциялық монеталарын айналысқа шығарады.
Монеталардың сатылымға шығатын күні туралы ақпарат ҚҰБ ресми сайтында қосымша орналастырылады.
ҚҰБ Қазақстан футбол федерациясымен бірлескен жоба аясында «Қазақстанның футбол клубтары» коллекциялық монеталарының 13 түрін айналысқа шығарады. Монеталарда 2024 жылғы маусымның ҚР премьер-лигасы клубтарының логотиптері бейнеленген. Монеталар әр түрінен 7000 дана таралыммен дайындалады. Оның 5000 данасы жеке блистерде және әр түрінен 2000 монета «Қазақстанның футбол клубтары» кәдесый блистер жиынтығында жинақталады.
Монеталар мельхиор (МН 25) қоспасынан дайындалған. Массасы – 15 грамм, диаметрі – 33 мм, дайындау сапасы – brilliant uncirculated, номиналы – 200 теңге, таралымы – әр түрінен 7000 (жеті мың) дана.
«Қазақстанның футбол федерациясы» монетасында Қазақстан Футбол Федерациясының логотипі бейнеленген. Ол 2000 дана таралыммен дайындалып, «Қазақстанның футбол клубтары» кәдесый блистер жиынтығының құрамында сатылады.
Монеталар мельхиор (МН 25) қоспасынан дайындалған. Массасы – 15 грамм, диаметрі – 33 мм, дайындау сапасы – brilliant uncirculated, номиналы – 200 теңге, таралымы –2000 (екі мың) дана.
Коллекциялық монеталар Қазақстан Республикасының бүкіл аумағында өздерінің белгіленген құнына сай төлемдердің барлық түрі бойынша қабылдауға, сондай-ақ елдің барлық банкінде банк шоттарына есепке алуға, аударуға, ұсақтауға және айырбастауға жатады.
Коллекциялық монеталар Қазақстан теңге сарайында дайындалды.
Тамаша!🔥
