Кеш жарық, құрметті оқырман!
Назарларыңызға бүгінгі күннің ең маңызды жаңалықтарын ұсынамыз ✅
Енді көлік терезесінен басын шығарғандарға 10 АЕК көлемінде айыппұл салынады
ІІМ Әкімшілік полиция комитетінің төрағасы Қайсар Сұлтанбаевтың айтуынша, жол қозғалысы қауіпсіздігін күшейту мақсатында заңнамаларға өзгерістер енгізілді. Соның ішінде көлік қозғалысы кезінде терезеден басын шығару сияқты қауіпті әрекеттерге де жауапкершілік қарастырылған.
— Кейде жастар көліктен басын шығарып, өз өміріне қауіп төндіреді. Мұндай жағдайлар көбіне мектеп бітіру кештері мен үйлену тойларында жиі кездеседі. Өкінішке қарай, адамдар өз қауіпсіздігіне мән бермей, осындай әрекеттерге барып жатады. Сондықтан жаңа өзгерістер ең алдымен жолаушылардың өмірі мен денсаулығын қорғауға бағытталған, — деді Сұлтанбаев.
Енді көлік қозғалысы кезінде терезеден басын шығарған жолаушы да, оны ескертуі тиіс жүргізуші де бірдей жауапқа тартылады. Бұл ереже бұзылған жағдайда 10 АЕК (39 320 теңге) көлемінде айыппұл салынады.
Ескере жүріңіз!📌
Қазақстан халқының несие жүктемесі дамыған елдерден әлдеқайда төмен
Қазақстандағы халықтың несие жүктемесі жаһандық көрсеткіштермен салыстырғанда төмен деңгейде қалып отыр. Бұл туралы Ranking.kz зерттеуінде жазылған. 2023 жылдың қорытындысы бойынша елдегі үй шаруашылықтарының қарыздары мен кредиттерінің жалпы ішкі өнімге (ЖІӨ) шаққандағы үлесі небәрі 15,2%-ды құраған.
Бұл көрсеткіш Халықаралық есеп айырысу банкі (BIS) белгілеген жүйелік тәуекелдер шегінен төрт есе төмен. BIS шкаласына сәйкес:
• ЖІӨ-нің 20%-ына дейінгі қарыз жүктемесі – өте төмен деңгей;
• 60%-дан жоғары көрсеткіш – экономикалық тұрақтылыққа және тұтынушылық сұранысқа теріс әсер ету қаупін тудырады.
Осылайша, Қазақстан әлемдегі несие алу деңгейі ең төмен 15 елдің қатарына еніп отыр. Халықаралық валюта қоры (ХВҚ) зерттеген 70 елдің ішінде бұл – төмен көрсеткіштердің бірі.
Көршілес және дамыған елдердегі жағдай
Салыстыру үшін Ресейде үй шаруашылықтарының қарыздарының ЖІӨ-ге шаққандағы үлесі 22,19%-ды құрайды, бұл Қазақстанға қарағанда шамамен 7 пайыздық тармаққа жоғары. Қытайда бұл көрсеткіш 63,67%-ға жетіп, BIS белгілеген 60%-дық межеден асып кеткен.
Экономикасы дамыған елдерде несие жүктемесі айтарлықтай жоғары:
• Канада – 102,21%
• Швейцария – 126,5%
• АҚШ – 72,9%
• Ұлыбритания – 77,8%
• Швеция – 83,4%
• Норвегия – 86,48%
• Франция – 62,63%
• Жапония – 65,66%
• Оңтүстік Корея – 93,54%
Экономикасы қарқынды дамып келе жатқан елдерде де несие жүктемесі Қазақстанға қарағанда жоғары:
• Бразилия – 34,9%
• Чили – 46,34%
• Үндістан – 39,16%
• Оңтүстік Африка Республикасы (ОАР) – 33,92%
• Таиланд – 86,88%
• Малайзия – 69,41%
Осы деректерге сүйенсек, Қазақстан халқының несиеге тәуелділігі әлемдік орташа деңгейден әлдеқайда төмен екенін көруге болады.
Көрсеткіш әлі де көңіл көншітпейді😮
Алматы облысында экстремизмді алдын алу мақсатында комикстерге 19 млн теңге жұмсалмақ
Алматы облысының дін істері басқармасы “дәстүрлі құндылықтарды насихаттау” және “экстремизмнің алдын алу” мақсатында 19,7 млн теңгеге анимациялық комикстер әзірлеуді жоспарлап отыр. Жоба аясында қазақ және орыс тілдерінде кемінде 10 анимациялық комикс жасалады, әрбірі 15 беттен тұрады, жалпы таралымы 1000 данадан кем болмайды. Сонымен қатар, видеокомикс форматында 10 шығарылым да әзірленеді.
Алматы облысы әкімдігінің баспасөз қызметі бұл жобаның маңыздылығын түсіндіріп, оның жастар арасында медиа сауаттылықты арттыруға, ұлттық бірегейлікті нығайтуға және экстремизмнің алдын алу шараларын күшейтуге бағытталғанын атап өтті. Жоба аясында әзірленетін ақпараттық-цифрлық материалдардың мақсаты – жас буынды онлайн кеңістіктегі деструктивті контенттен қорғау.
2024 жылғы әлеуметтік зерттеулердің нәтижесіне сәйкес, Алматы облысындағы кәмелетке толмағандардың 55%-дан астамы діни сенімге ие және олардың 35%-ы діни ақпаратты интернет арқылы алады. Осы көрсеткіштерге сәйкес, жоба жастардың сыни ойлау қабілетін дамытып, медиа сауаттылық деңгейін көтеруді көздейді. Жоба 2025 жылдың соңына дейін аяқталуы тиіс.
Жаңа жоба іске қосылмақ!👍
Бірінші сыныпқа өтініштер 31 тамызға дейін қабылданады
Оқу-ағарту министрлігі бірінші сыныпқа өтініштерді қабылдау 31 тамызға дейін жалғасатынын хабарлады.
Биыл өтініштер әдеттегідей бес ай бойы қабылданады. Болжам бойынша бірінші сыныпқа 370 мыңнан астам бала барады.
«Алғашқы үш күнде 24 мыңға жуық өтініш келіп түсті. Ең үлкен белсенділік Астана мен Түркістан облысында байқалуда. Ата-аналардың шамамен 70 проценті мемлекеттік тілде оқытуды таңдады», — делінген ресми хабарламада.
Білім туралы заңға сәйкес, бірінші сыныпқа ата-ананың немесе заңды өкілінің өтініші негізінде алты жасқа толған балалар қабылданады.
Өтінішті онлайн — eGov.kz электрондық үкімет порталы арқылы немесе eGov Mobile мобильді қосымшасы, сондай — ақ тікелей мектепте беруге болады. Өтінімдер дүйсенбіден жұмаға дейін қабылданады.
Айта кетері, биыл бірінші сыныпқа өтініштерді қабылдау басталған 1 сәуір күні электронды үкімет порталы істемей қалды. Сол министрлік өкілдері негізгі себебін айтқан.
Құлаққағыс!‼️
