🙌20 қазан — Халықаралық аспазшылар күні. Адамдар әрқашан дәмді тамақтанғысы келеді. Сондықтан аспаз мамандығы — әлемде сұранысқа ие және ең көне мамандықтардың бірі. Қағазға жазылған алғашқы мәзірлер Вавилонда, Ежелгі Мысырда, Қытайда, сондай-ақ Араб Шығыс елдерінде пайда болды. Олардың кейбіреуі бізге дейін жетті. Бүгінде кез келген адам Мысыр перғауны, Қытай немесе Рим императоры жеген тағамдарды дайындауға тырысуы мүмкін.
Сіздің сүйікті тағамыңыз қандай?
👀20 қазанда халықаралық әуе диспетчері күні аталып өтеді. Аспандағы жолаушылардың қауіпсіздігі тек ұшқыштар мен техниктердің ғана емес, жердегі адамдардың да қолында. Осы тұста әуе қозғалысының диспетчерлеріне үлкен жауапкершілік жүктеліп, олардың кәсібилігіне жоғары талаптар қойылады. Бұл мамандар соқтығысудың алдын алу үшін жердегі және әуедегі әуе кемелерінің қауіпсіз және тәртіпті қозғалысын бақылап, қамтамасыз етуге, ал ерекше жағдайларда әуе кемесінің экипажына қажетті көмек көрсетуге міндетті.
Егер таныстарыңыздың арасында әуе диспетчерлері болса, оларды мерекесімен құттықтауды ұмытпаңыз!
💪20 қазан — Дүниежүзілік остеопорозға қарсы күрес күні. Бұл күннің мақсаты – көпшілікті аурудың қауіптілігі туралы хабардар ету. Соңғы мәліметтерге сүйенсек, қазақстандықтардың 20 пайыздан астамы остеопорозбен ауырады. Олардың көпшілігі егде жастағы адамдар. Аурудың алдын алу үшін дәрігерлер жаттығу бағдарламаларын, соның ішінде жаяу жүруді ұсынады. Сонымен қатар адам ағзасына қажет әрі кальцийге бай сүтті жеткілікті мөлшерде тұтыну қажет.
👥20 қазан танымал екі қазақстандықтың туған күні. 91 жыл бұрын жазушы, ақын, журналист, публицист, Қазақстанның еңбек сіңірген қайраткері Нұрғожа Ораз (1932-2016) дүниеге келді. 40-тан астам кітаптың авторы оқырманға «Достар хаты», «Жауқазын шақ» повестері және «Көңіл көктемі» поэтикалық жинағы бойынша танымал. Оның кітаптарының кейіпкерлері қарапайым кәсіптің адамдары. Бірақ қиын тағдырларына қарамастан кедергілерді жеңіп шығады. Осылайша жазушы өзінің шығармалары арқылы көпшілікті ерік-жігері мықты, мінезді, өзін-өзі қорғай білуге тәрбиелейді. 60 жыл бұрын ауыр атлет, 1988 жылғы Олимпиада ойындарының жеңімпазы Анатолий Храпатый (1963-2008) дүниеге келді. Ол сондай-ақ 1996 жылғы Олимпиаданың күміс медалінің иегері, бес дүркін әлем чемпионы және бес дүркін Еуропа чемпионы. Спорттық мансап жолында ол 5 әлемдік рекорд орнатты. Өкінішке қарай, спортшы 45 жасында Астана-Алматы тас жолында автокөлікпен соқтығысу салдарынан қаза тапты.
